من الاكلات الشعبية العراقية اللذيذة الباجة اكلة شتويةطريقة تحضير الباجة اهم شي بالباجة هو طريقة تنظيفها مهم جداااا الاعتناء بتنظيف الباجة حتى لو نشتريها نظيفة لازم نشعوطها على نار ونغسلها كلش زين قبل مانطبخها
اولا قبل طبخ الباجة( راس الخروف) نقطع مقدمة الراس الانف مالتها ومن نشتريها من القصاب نطلب منه يقطعة النا وراها نشعوطها على لهب الطباخ حتى نتخلص من كل الشعر الي موجود بيها حتى لو نظيفة ونفس الشي نسويه وي الكراعين اي رجلين الخروف
بعدها نغسلها اكثر من مرة بفرشاه نظيفة ونرش عليها ملح ونعيد غسلها جيدا
نضعها بقدر ومن تصعد الزفرة نرفعها كلها اكو ناس يبدلون الماء كله بماء جديد احنا نظل نرفع الزفرة مالتها الى ان نتخلص منها كلها بعدها نتركها على نار وسط الى ان تستوي ونضع الها مطيبات هيل ورق غار ونتركها على نار تستوي ومن تستوي نضيف الملح واكييد تشوفها يبدي اللحم ينفصل عن الراس من تستوي
(لتحضير الكيبايات (الكرشة
والممبار
نفس الشي اهم شي نظافه الكرشة والممبار نشتريها نظيفة بس هم تحتاج عناية ونظافة نغسلها عدة مرات بالفرشاة ونرش عليها ملح نتركها ونرجع نغسلها نتاكد من نظافتها جيدا والممبار نقلبه ونغسله كلش زين
قطع الكرشة نقصها حسب كبر الكرشة الي نريدها وبعدها نبدي نخيطها على شكل جيب نبقي جهة واحدة مفتوحة حتى نحط بيها الحشوة ونخيطها زين حتى الحشوة ماتطلع من الكيبايات وتبقى بداخلها
(لتحضير الحشوة ننقع الرز لنصف ساعة ونصفي من الماء نضيف اله لحم المفروم وبيه لحم غنم ولية شوية وكشمش (زبيب
وملح وفلفل اسود ودارسين قرفة ونخلطها سوية ونبدي نحشي الممبار والكرشة وبعد مانحط الحشوة نخيطهم زين
بقدر على جهة نغلي ماء ونضيف اله الكرشة والممبار ونننتظر تصعد زفرة نتخلص منها نتركها على نار تقريبا ساعة تستوي وبعدها نخليها تكمل سواءها وي الباجة وتاخذ وقت الى ان تستوي الاستواء يبين من تلين الكرشة والممبار
يعني استوت
طبعا نحطها وي الباجة بعد مارفعنا عنها الزفرة ونكمل استوائهم سوية
نحضر تشريب الباجة ننقع خبز التنور بيه ونقدمة وي راس الخروف والكراعين واللسان والطرشي والنارنج والبصل وطبعا لبن وثوم
واكلة هية من العمر تحتاج تعب ومجهود وعناية حتى نحصل على طعم لذيذ جدااااا
والي يميز الباجة العراقية بطعمها هي نكهة الخروف العراقي لان اني مجربتها بغير لحم طيبة تطلع اذا اعتنينا بيها بس مو نفس النكهة والطعم
صحة وهنااااا ان شاء الله تعجبكم
0 comments:
Post a Comment